Diálogo

A base di artíkulo 4, insiso 1, di e ordenansa ‘Landsverordening Georganiseerd Overleg in Ambtenarenzaken’ tin un Centraal Georganiseerd Overleg in Ambtenarenzaken (CGOA), ku ta konsistí di dos partido. Na un banda gobièrnu, representá pa Minister di Maneho di Gobernashon, Planifikashon i Servisio Públiko (BPD) i na otro banda Komishon Sentral di Sindikatonan (CCvV). Den CGOA diálogo ta tuma lugá riba asuntunan di interes general pa ku posishon hurídiko di ámtenarnan, inkluyendo maneho general pa personal den servisio públiko.

E obligashon pa diálogá den CGOA ta ankrá tambe den artíkulo 10, insiso 1, di e ordenansa, ku ta stipulá ku e Minister no por tuma desishonnan enkuanto proposishonnan ku tin di haber ku asuntunan di interes general pa ku posishon hurídiko di ámtenarnan sin ku tabatin diálogo i/òf deliberashon.

Por lo tantu, desishon gubernamental riba asuntunan ku ta regardá posishon hurídiko di empleadonan públiko por ser tumá solamente despues ku diálogo i/òf deliberashon a tuma lugá den seno di CGOA i despues ku e partidonan aki a yega na un konsenso ku otro. Esaki ta wòrdu ankrá den un konvenio (‘convenant’), firmá pa partidonan i tambe pa presidente di CGOA. En todo kaso (kontenido di) e konvenio ta wòrdu hasí públiko dor di presidente di CGOA den konsulta ku partidonan.

Centraal Georganiseerd Overleg in Ambtenarenzaken

Ansinghstraat #17
Curaçao
Tel: +5999 461 5406 / 5328
Fax: +5999 461 5399