Tayer riba funshonamentu di plataforma di diálogo CGOA

Willemstad, 11 di desèmber 2018 – Pa yega na mas efisiensia i efikasia den funshonamentu di e plataforma bilateral di diálogo entre gobièrnu, komo dunadó di trabou, i representashon sindikal di empleadonan públiko, konosí komo CGOA (Centraal Georganiseerd Overleg in Ambtenarenzaken), a organisá un tayer djaweps dia 6 i djabièrne dia 7 di desèmber último den sala di reunion Wayaká na World Trade Centre (WTC).

E tayer, na kua a partisipá minister Armin Konket di Maneho di Gobernashon, Planifikashon i Servisio Públiko (BPD) i miembronan di e Komishon Sentral di Sindikatonan (CCvV) den CGOA, a ser guiá pa presidente di CGOA prof. dr. ing. Valdemar Marcha i fasilitá pa sr. Rainer Pritzer, eksperto riba tereno di diálogo sosial i atministrashon laboral di e organisashon internashonal di labor ILO.

Durante e tayer partidonan a ekspresá nan prekupashonnan pa ku funshonamentu aktual di e plataforma, ku ta instituí pa lei, i a interkambiá di idea ku otro riba mekanismonan i aserkamentunan kon por mehorá e nivel i kalidat di e diálogo ku ta ser hibá den CGOA.

Komo fasilitadó sr. Pritzer a elaborá en ekstenso riba e rekisitonan nesesario kon pa hiba un diálogo fruktifero i efektivo. Mas aleu e eksperto di desendensia Aleman a para ketu na e normanan ku partidonan mester atené na dje, basá riba prinsipionan di ILO, pa por yega na resultadonan konkreto na bienestar di esnan ku nan ta representá i konsekuentemente na un funshonamentu mas efikas di gobièrnu.

Na final di e tayer partidonan a kumbiní ku otro ku lo organisá dia 20 di desèmber próksimo un reunion di CGOA kaminda lo bai elaborá mas a fondo riba interpretashon di e lei di CGOA ku den pasado resien tabata motibu pa basta kontroversia entre partidonan.

Riba e foto: e partisipantenan na e tayer.