Den kuadro di selebrashon di désimo aniversario di e ordenansa GOA

Seminario i tayer riba último trènts i desaroyonan riba tereno di diálogo sosial i relashonnan laboral den sektor públiko

Willemstad, 19 di novèmber 2018 – Pa konmemorá e désimo aniversario di e ordenansa ku a instituí e plataforma di diálogo bipartit entre Gobièrnu, komo dunadó di trabou, i representantenan di empleadonan públiko, uní den e komishon sentral di sindikatonan (CCvV), e plataforma aki, konosí komo CGOA (Centraal Georganiseerd Overleg in Ambtenarenzaken), lo organisá djaweps dia 6 di desémber 2018 un seminario den òula di universidat Dr. Moises da Costa Gomez.
E tema di e seminario lo ta ‘Social Dialogue and Labour Relations; Trends and Perspectives in the Public Sector in the Sub Region and Across Regions’ . Oradonan i invitadonan spesial di e Organisashon Internashonal di Labor (ILO) lo duna un bista di e último desaroyonan enkuanto diálogo sosial i su impakto riba relashonnan laboral den sektor públiko. Basá riba ‘best practices’ den Karibe i den otro partinan di mundu lo elaborá riba mekanismonan i pensamentunan kon pa strukturá e diálogo pa e ta unu mas efektivo.
E seminario ta destiná pa un òudiensia selektá. Despues di e seminario lo tin un tayer, esklusivamente pa partidonan den CGOA kaminda lo bai mas a fondo riba e rétonan i oportunidatnan pa ku un funshonamentu mas efektivo i efikas di e plataforma CGOA.
E tayer lo wòrdu fasilitá pa un eksperto di ILO riba tereno di diálogo sosial i atministrashon laboral.