Komishon di Konseho i Arbitrahe ta tene promé reunion pa atendé ku asuntunan prosedural i logístiko

WILLEMSTAD, 3 di òktober 2018 – Riba inisiativa di sr. mr. Fred Wiel, ku pa medio di e dekreto gubernamental fechá 12 di yüli 2018, nr. 18/2258 (zaaknummer 2017/043108) a keda nombrá komo presidente di e Komishon di Konseho i Arbitrahe konforme artíkulo 11 di e ordenansa ‘Landsverordening Georganiseerd Overleg in Ambtenarenzaken’ (P.B. 2008, no. 70), a tuma lugá awe mainta, den sala di reunion di SER/GOA na Ansinghstraat, un promé enkuentro di e Komishon pa atendé ku asuntunan prosedural i logístiko.
Durante e enkuentro aki tur miembro i miembronan suplente di e Komishon tabata presente, ku eksepshon di e miembro suplente sr. Oscar Dalnoot ku pa motibunan inprevisto no por a bini. E miembronan i miembronan suplente a hasi uso di e oportunidat pa sera konosí mas a fondo ku otro i pa konhuntamente delineá un método kon pa atendé ku e trabou di konseho i arbitrahe manera e ordenansa ariba menshoná ta preskribí.
Mas aleu e Komishon a papia riba aspektonan manera di ki forma e kier wòrdu sostené riba nivel tékniko, logístiko i atministrativo i ki remunerashon e miembronan por risibí pa nan trabounan.
A palabrá ku Sekretariado di SER/GOA lo asesorá e Komishon den ehekushon di su tarea legal i ku lo evaluá si e montante, ku aktualmente ta presupuestá pa e trabou di Komishon di Konseho i Arbitrahe, mester ser ahustá.

Riba e foto: e miembronan i miembronan suplente di e Komishon di Konseho i Arbitrahe den deliberashon ku otro bou di guia di e presidente di e Komishon sr. Wiel. Na mesa sintá por wak tambe e direktor/sekretario general di SER/GOA sr. drs. Raul Henriquez, akompañá pa sra. mr. Sharlyn Curial-Villarreal (hurista mayó), kende a duna informashon na e Komishon riba petishon di e presidente.