Raportahe na Organisashon Internashonal di Labor (ILO) riba kumplimentu ku konvenshon number 151 di ILO (kondishonnan laboral den sektor públiko)

Willemstad, 29 di òugustus 2018 – Gobièrnu di Kòrsou a manda dia 22 di òugustus último, pa medio di un karta firmá dor di Promé Minister señor Eugène Rhuggenaath, un raportahe ekstenso pa e sede prinsipal di Organisashon Internashonal di Labor (ILO), situá na Ginebra, Suisa, den kua ta raportá riba kumplimentu di parti di Kòrsou ku diferente konvenshon di ILO, ku a ser ratifiká dor di Kòrsou, bou di kua konvenshon number 151 ku ta regardá kondishonnan di trabou den sektor públiko (‘Labour Relations (Public Service) Convention, 1978 (No.151)’)

Konvenshon di ILO number 151 a ser ratifiká dor di Kòrsou na mèi 2016. Pa e teksto integral di e ‘Labour Relations (Public Service) Convention, 1978 (No.151)’ por bishita e siguiente sitio riba ret digital:

http://www.ilo.org/dyn/normlex/en/f?p=NORMLEXPUB:12100:0::NO:12100:P12100_ILO_CODE:C151

Ta pa promé biaha ku Kòrsou ta raportá riba e konvenshon aki. Pa preparashon di e raportahe, Komishon Sentral di Sindikatonan (CCvV), komo partido den e plataforma CGOA a base di artíkulo 4, insiso 1, di e ordenansa ‘Landsverordening GOA’, a duna, riba petishon di Gobièrnu, un aporte por eskrito ku a ser entregá na Minister di Desaroyo Sosial, Labor i Bienestar (SOAW) pa mandé dor, despues di aprobashon dor di Konseho di Ministernan, pa sede di ILO komo parti di e raportahe final.

Den e raportahe enkuanto konvenshon 151, ku finalmente a bai sede di e organisashon internashonal di labor na Ginebra, ta pará ku en términonan general Kòrsou ta kumpli ku e konvenshon aki basá riba entre otro e siguiente konsiderashonnan:

  • ku ta eskistí for di aña 2008 un kuadro legal, den forma di un ordenansa nashonal (‘Landsverordening GOA’), ku ta rigi e diálogo ku Gobièrnu enkuanto materianan di interes general ku ta konserní posishon hurídiko di empleadonan públiko;
  • ku e diálogo aki ta tuma lugá den un plataforma institushonalisá kaminda Gobièrnu, representá pa Minister di Maneho di Gobernashon, Planifikashon i Servisio Públiko (BPD), huntu ku representashon di 5 organishashon sindikal ku ta ser konsiderá komo representativo (uní den CCvV) ta deliberá ku otro riba témanan general ku ta konserní posishon hurídiko di ámtenarnan;
  • ku entre 2008 te ku awor diferente konvenio a keda será i firmá, spesialmente durante añanan 2014 i 2015, entre partidonan riba diferente tema, relatá na entre otro status legal di ámtenarnan i optimalisashon di funshonamentu di aparato públiko;
  • ku durante aña 2017 e plataforma di CGOA a reuní 13 biaha
  • ku durante aña 2017 CCvV a reuní 28 biaha i
  • ku durante e aña ei tabatatin 3 reunionnan di komishonnan instituí pa partidonan.